എറണാകുളം ജില്ലയുടെ വടക്ക് കിഴക്ക് അങ്കമാലി ഹൈവെ ജംഗ്ഷനില്‍ നിന്നും 6 കി. മീ. കിഴക്ക് ഭാഗത്തായിട്ടാണ് മഞ്ഞപ്ര ഗ്രാമപഞ്ചായത്ത് സ്ഥിതിചെയ്യുന്നത്. പഞ്ചായത്തിനോട് ചേര്‍ന്ന് കിടക്കുന്ന തീര്‍ത്ഥാടന കേന്ദ്രങ്ങളാണ് ശ്രീ ശങ്കരാചാര്യരുടെ ജന്‍മംകൊണ്ട് പവിത്രമായ കാലടിയും, സെന്‍റ് തോമസിന്‍റെ പാദസ്പര്‍ശം കൊണ്ട് അനുഗ്രഹീതമായ മലയാറ്റൂരും. ചരിത്രരേഖകളില്‍ മഞ്ഞപാറ എന്നുകൂടി പറഞ്ഞുകാണുന്ന ഈ നാടിന്‍റെ പ്രാചീനത വിളംബരം ചെയ്യുന്നതാണ് പുത്തൂര്‍പ്പിള്ളി ക്ഷേത്രഭിത്തിയിലുള്ള വട്ടെഴുത്ത് രേഖ.

ഈ ഭരണസംവിധാനത്തിലുണ്ടായ മാറ്റം നിമിത്തം തിരുവിതാംകൂറിനോട് ചേര്‍ക്കപ്പെട്ട ആലങ്ങാട് മണ്ഡപത്തില്‍ ഉള്‍പ്പെട്ട പ്രവര്‍ത്തി മഞ്ഞപ്ര ആയിരുന്നു. അക്കാലത്ത് പ്രവര്‍ത്തിയുടെ ഭരണത്തലവന്‍ ചന്ദ്രക്കാരനായിരുന്നു. റവന്യൂജുഡീഷ്യല്‍ അധികാരത്തിന് പുറമെ ക്ഷേത്രഭരണാധികാരവും ചന്ദ്രക്കാരനില്‍ ആയിരുന്നു. ചന്ദ്രക്കാരന്‍റെ ഓഫീസ് ഇരുന്ന സ്ഥലത്തിന് ചന്ദ്രപ്പുര എന്നായിരുന്നു നാമധേയം. മഞ്ഞപ്ര ഗ്രാമപഞ്ചായത്തിന്റെ പ്രധാന ജംഗ്ഷനുകളില്‍ ഒന്നാണ് ചന്ദ്രപ്പുര.

50 ച.മൈല്‍ വിസ്തീര്‍ണ്ണമുണ്ടായിരുന്ന മഞ്ഞപ്ര പഞ്ചായത്തില്‍ നിന്നും ആനപ്പാറ, ദേവഗിരി ഭാഗങ്ങള്‍ തുറവൂര്‍ പഞ്ചായത്തിലേക്ക് മാറ്റി വലിയ തോടിന്‍റെ കിഴക്കുംഭാഗം അയ്യമ്പുഴ പഞ്ചായത്തായി 1980-ല്‍ രൂപീകരിച്ചു. ഇപ്രകാരം മഞ്ഞപ്ര വില്ലേജ് മുഴുവന്‍ ഉള്‍പ്പെടുന്ന മഞ്ഞപ്ര പഞ്ചായത്ത് എറണാകുളം ജില്ലയിലെ ഏറ്റവും ചെറിയ പഞ്ചായത്ത് ആയി തീര്‍ന്നു.

ഈ പ്രദേശത്തെ ആരാധനാലയങ്ങള്‍ എല്ലാം തന്നെ വളരെ പഴക്കം ചെന്നവയാണ്. ഇവിടങ്ങളിലെ ഉത്സവാഘോഷങ്ങളില്‍ ജാതിമതഭേദമെന്യേ എല്ലാവരും സഹകരിച്ച് സജീവമായി പങ്കെടുക്കുകയും ചെയ്യുന്നത് മതസൌഹാര്‍ദ്ദത്തിന്‍റെ ഉത്തമ പ്രതീകമാണ്. ക്രിസ്ത്യന്‍ പള്ളിയില്‍ തിരുന്നാളാഘോഷത്തിന് കുത്തുവിളക്ക് പിടിക്കുന്നത് ഇന്നും ഹിന്ദുക്കളാണ്.